जीव पिसाटला - परतू

( ऑडीओ - व्हीडीओ सहित )

वेड लावे जीवाला बघुनी तुला
पास असुनी तुझी आस लागे मला

एक क्षणही नकोसा दुरावा तुझा
श्वास माझा म्हणू की पुरावा तुझा
काय होणार माझे कळे ना मला
प्रेम छळते किती हे मला तुला
जीव पिसाटला पिसाटला रामा

बोलणे हे तुझे की फुलांचा सडा
हासता किणकिणे चांदण्यांचा चुडा
एवढासाच शृंगार पुरतो तुला
दृष्ट लागो न माझीच माझ्या फुला
जीव पिसाटला पिसाटला रामा

तूच तू सोबती तूच दाही दिशा
ध्यास हि तूच नि तूच माझी नशा
सावली तू कधी तू उन्हाच्या झळा
सांग डोळ्यात लपवू कसा मी तुला
रंग झालो तुझा रंगता रंगता
आग पाणी जणू एक झाले आता
जीव पिसाटला पिसाटला रामा

---

गायक - जसराज जोशी 

चित्रपट - परतू 

संगीत - शशांक पवार 

गीत - वैभव जोशी 

Singer: Jasraj Joshi

Movie: Partu
Music: Shashank Powar
Lyrics: Vaibhav Joshi

---

---

( Jeev pisatla - Partu - Jasraaj Joshi)

ओल्या सांजवेळी - प्रेमाची गोष्ट

( ऑडीओ - व्हीडीओ सहित )
ओल्या सांजवेळी, उन्हे सावलीस बिलगावी
तशी तू जवळी  ये जरा

कोऱ्या कागदाची, कविता अन जशी व्हावी
तशी तू हलके बोल ना

आभाळ खाली झुके, पावलांखाली धुके
सुख हे नवे सलगी करे, का सांग ना

सारे जुने दुवे, जळती जसे दिवे
पाण्यावरी  जरा सोडून देऊया

माझी ही आर्जवे, पसरून काजवे
जातील  या नव्या वाटेवरी तुझ्या

रस्ता नवा शोधू जरा, हातात हात दे
पुसुया जुन्या पाउल खुणा
सोबत  तुझी साथ दे

वळणावरी तुझ्या पाऊस मी उभा
ओंजळ तुझी पुन्हा वाहून जाऊ दे

डोळ्यातल्या सरी विसरून ये घरी
ओळख आता खरी होऊन जाऊ दे

सांभाळ तू माझे मला माझ्या नव्या फुला
मी सावली होऊन तुझी देईन साथ ही तुला

---

गीतकार : अश्विनी शेंडे

गायक : बेला शेंडे - स्वप्नील बांदोडकर

संगीत : अविनाश - विश्वजित 

चित्रपट : प्रेमाची गोष्ट 

Lyrics : Ashwini Shende

Singer : Bela Shende - Swapnil Bandodkar 

Music: Avinash - Vishwajeet  

Movie : Premachi Goshta

---

---

( Olya Sanjweli  -  Premachi Goshta)

टिक टिक वाजते डोक्यात - दुनियादारी

( ऑडीओ - व्हीडीओ सहित )

टिक टिक वाजते डोक्यात
धड धड वाढते ठोक्यात
कभी जमीन कधी नभी, संपते अंतर झोक्यात

नाही जरी सरी तरी भिजते अंग पाण्याने 
सोचू तुम्हें पलभर भी बरसे सावन जोमाने 
शिंपल्यांचे शो-पीस नको
जीव अडकला मोत्यात 
टिक टिक वाजते ..


सूर ही तू, ताल ही तू 
रुठे जो चांद वो नूर है तू 
आसु ही तू हसू ही तू 
ओढ मनाची नि हूरहुर तू 
रोज नवे भास तुझे, वाढते अंतर श्वासात 
टिक टिक वाजते ..

---

गीतकार : मंगेश कांगणे 
संगीतकार : पंकज पडघन 
गायक : सोनू निगम - सायली पंकज
चित्रपट : दुनियादारी 
 Lyricist : Mangesh kangane 
Music Director : Pankaj Padghan 
Singer : Sonu Nigam ,Sayali Pankaj 
Movie : Duniyadari

---

---

( Tik Tik wajate Dokyat - Duniadari )

तू गेल्यावर असे हरवले सुर - शांताराम नांदगावकर

( ऑडीओ - व्हीडीओ सहित )
तू गेल्यावर …(२)
असे हरवले सुर
हरवले गाणे
वेलीवरचे फूल ठिबकले
हळवे दर्द दिवाणे
हरवले गाणे …(३) || ध्रु ||

शब्दांचा संभार आटला
गीतातुन अंधार दाटला …(२)
पाण्यावर थरथरले अवचित
मार्दव अश्रु तराणे || १ ||

हरवले गाणे …(३)

---

गायिका : अनुराधा पौडवाल
गायक : सुरेश वाडकर
गीत : शांताराम नांदगावकर

संगीत : अरुण पौडवाल

---

---

( Tu Gelyawar ase harawale sur - Shantaram Nandgaokar - Singer Suresh wadkar)

कसे सरतील सये - संदीप खरे

( ऑडीओ - व्हीडीओ सहित )
कसे सरतील सये माझ्याविना दिस तुझे ?
सरताना आणि सांग सलतील ना !
गुलाबाची फुलं दोन रोज राती डोळ्यांवर
मुसूमुसू पाणी सांग भरतील ना ! .....

पावसाच्या धारा धारा ..... मोजताना दिस सारा
रिते रिते मन तुझे उरे .....
ओठभर हसे हसे..... उरातून वेडेपिसे
खोल खोल कोण आत झुरे ?
आता जरा अळिमिळी
तुझी माझी व्यथा निळी
सोसताना सुखावून हसशील ना ! .....

कोण तुझ्या सौधातून उभे असे सामसूम
चिडीचूप ..... सुनसान दिवा !
आता सांज ढळेलच आणि पुन्हा छळेलच
नभातून गोरा चांदवा !!
चांदण्याचे कोटी कण
आठवांचे ओले सण
रोज रोज नीजभर भरतील ना ! .....

इथे दूरदेशी माझ्या सुन्या खिडकीच्यापाशी
झडे सर ..... काचभर तडा !
तूच तूच ..... तुझ्या तुझ्या ..... तुझी तुझी ..... तुझे तुझे
सारा सारा तुझा तुझा सडा !! -
पडे माझ्या वाटेतून
आणि मग काट्यातून
- जातानाही पायभर मखमल ना ! .....

आता नाही बोलायाचे ..... जरा जरा जगायाचे
माळुनिया अबोलीची फुले !
देहभर हलू देत ..... विजेवर झुलू देत
तुझ्या माझ्या विरहाचे झुले !!
जरा घन झुरू दे ना
वारा गुदमरू दे ना
तेव्हा नभ धरा सारी भिजवील ना ! .....

---

गीत : संदीप खरे संगीत : संदीप खरे स्वर : संदीप खरे

---

Get this widget | Track details | eSnips Social DNA

---

---

( Kase sartil saye - Sandip Khare )

प्रेमा, काय देऊ तुला ? - पी. सावळाराम

( ऑडीओ - व्हीडीओ सहित )
प्रेमा, काय देऊ तुला ?
भाग्य दिले तू मला

प्रीतीच्या या पाखराचे रत्‍नकांचनी पंख देऊ का
देऊ तुला का हर्षगंध हा जीव फुलातून मोहरलेला

या हृदयीच्या जलवंतीची निळी ओढ ती तुला हवी का
रूप मोहिनी लावण्याची हवी तुझ्या का चंद्रकलेला

मोहक सुंदर जे जे दिसते, तूच तयांचा जन्मदाता
घेशील का रे माझ्याकरिता अधरीच्या या अमृताला

---

गीत : पी. सावळाराम
संगीत : वसंत प्रभू
स्वर : लता मंगेशकर

---

---

( Prema Kaay deu tula, bhagya dile tu mala - P Sawalaraam )

देव जरी मज कधी भेटला - पी. सावळाराम

( ऑडीओ - व्हीडीओ सहित )
देव जरी मज कधी भेटला,
माग हवे ते माग म्हणाला
म्हणेन प्रभू रे माझे सारे,
जीवन देई मम बाळाला

कृष्णा गोदा स्नान घालु दे,
रखुमाबाई तीट लावु दे
ज्ञानेशाची गाऊन ओवी,
मुक्ताई निजवु दे तुजला

शिवरायाच्या मागिन शौर्या,
कर्णाच्या घेइन औदार्या
ध्रुव, चिलयाच्या अभंग प्रेमा,
लाभु दे चिमण्या राजाला

---

गीत : पी. सावळाराम
संगीत : वसंत देसाई
स्वर : आशा भोसले

---

---

( Dev jari maj kadhi bhetala - P Sawalaraam )

तुझे गीत गाण्यासाठी - मंगेश पाडगावकर

( ऑडीओ - व्हीडीओ सहित )
तिन्ही लोक आनंदाने भरुन गाउ दे रे
तुझे गीत गाण्यासाठी सूर लावु दे रे

शुभ्र तुरे माळुन आल्या निळ्या निळ्या लाटा
रानफुले लेवुन सजल्या या हिरव्या वाटा
या सुंदर यात्रेसाठी मला जाउ दे रे
तुझे गीत गाण्यासाठी सूर लावु दे रे

मोर केशरांचे झुलती पहाटेस दारी
झऱ्यातुनी दिडदा दिडदा वाजती सतारी
सोहळ्यात सौंदर्याच्या तुला पाहु दे रे
तुझे गीत गाण्यासाठी सूर लावु दे रे

शांत शांत उत्तररात्री मंद मंद तारे
तुझे प्रेम घेउन येती गंधधुंद वारे
चांदण्यात आनंदाच्या मला न्हाउ दे रे
तुझे गीत गाण्यासाठी सूर लावु दे रे

एक एक नक्षत्राचा दिवा लागताना
आणि फुले होण्यासाठी कळ्या जागताना
पौर्णिमा स्वरांची माझ्या तुला वाहु दे रे
तुझे गीत गाण्यासाठी सूर लावु दे रे

---

गीत : मंगेश पाडगावकर
संगीत : यशवंत देव
स्वर : सुधीर फडके

---

---

( Tujhe Geet ganyasathi , sur lawu de - Mangesh Padgaokar )

कळीदार कपूरी पान - राजा बढे

( ऑडीओ - व्हीडीओ सहित )
कळीदार कपूरी पान कोवळं छान केशरी चुना
रंगला काथ केवडा, वर्खाचा विडा घ्या हो मनरमणा

बारीक सुपारी निमचिकनी घालून
जायपत्री वेलची लवंग वरी दाबून
बांधले तसे या कुडीत पंचप्राण
घ्या रंगत करि मर्दुनी, चतुर्दशगुणी, सख्या सजणा

कमरेचा झुलता झोक नूर बिनधोक उरी मावेना
काजळी नजर छिनमिनी चांदणी रैना
छेडिता लालडी मुलाम तुमची गुलाम झाले सजणा
पायी पैंजण छ्न्नक छैना

---

गीत - राजा बढे
संगीत - श्रीनिवास खळे
स्वर - सुलोचना चव्हाण

---

Get this widget | Track details | eSnips Social DNA

---

---

( Kalidar kapuri paan , kowala chaan keshari chuna - Raja Badhe )

तरुण आहे रात्र अजुनी - सुरेश भट

( ऑडीओ - व्हीडीओ सहित )
तरुण आहे रात्र अजुनी राजसा निजलास का रे?
एवढ्यातच त्या कुशीवर तू असा वळलास का रे?

अजुनही विझल्या न गगनी तारकांच्या दीपमाला;
अजुन मी विझले कुठे रे? हाय ! तू विझलास का रे?

सांग, ह्या कोजागिरीच्या चांदण्याला काय सांगू ?
उमलते अंगांग माझे... आणि तू मिटलास का रे?

बघ तुला पुसतोच आहे पश्चिमेचा गार वारा
रातराणीच्या फुलांचा गंध तू लुटलास का रे?

उसळती हुदयात माझ्या अमृताच्या धुंद लाटा
तू किनाऱ्यासारखा पण कोरडा उरलास का रे?

ओठ अजुनी बंद का रे? श्वास ही मधुमंद का रे?
बोल, शेजेच्या फुलांवर तू असा रुसलास का रे?

---

गीत : सुरेश भट
संगीत : पं. हृदयनाथ मंगेशकर
स्वर : आशा भोसले

---

Get this widget | Track details | eSnips Social DNA

---

स्वर : आशा भोसले

---

स्वर : आरती अंकलीकर-टिकेकर

---

( Tarun aahe Ratra Ajuni - Suresh Bhat )

धुंद मधुमती - ग. दि. माडगूळकर

( ऑडीओ - व्हीडीओ सहित )
धुंद मधुमती रात रे, नाथ रे,
तनमन नाचे, यौवन नाचे
उगवला रजनीचा, नाथ रे, नाथ रे

जल लहरी या धीट धावती
हरित तटांचे ओठ चुंबिती
येइ प्रियकरा, येइ मंदिरा
अलि रमले कमलात रे, नाथ रे

ये रे ये का मग दूर उभा ?
ही घटिकाहि निसटुन जायची
फुलतील लाखो तारा,
परि ही रात कधि कधि ना यायची
चषक सुधेचा ओठी लावुनि
कटीभंवती धरि हात रे, नाथ रे

---

गीत : ग. दि. माडगूळकर
संगीत : मा. कृष्णराव
स्वर : लता मंगेशकर

---

Get this widget | Track details | eSnips Social DNA

---

( Dhund Madhumati raat re - Ga Di Madgulkar )

अग्गोबाई ढग्गोबाई - संदीप खरे

( ऑडीओ - व्हीडीओ सहित )
अग्गोबाई ढग्गोबाई लागली कळ
ढगाला उन्हाची केवढी झळ
थोडी न्‌ थोडकी लागली फार
डोंगराच्या डोळ्याला पाण्याची धार

वारा वारा गरागरा सो सो सूम्‌
ढोल्या ढोल्या ढगात ढुम ढुम ढुम
वीजबाई अशी काही तोऱ्यामधे खडी
आकाशाच्या पाठीवर चमचम छडी

खोलखोल जमिनीचे उघडून दार
बुडबुड बेडकाची बडबड फार
डुंबायला डबक्याचा करूया तलाव
साबु-बिबु नको थोडा चिखल लगाव

---

गीत : संदीप खरे
संगीत : सलिल कुळकर्णी
स्वर : सलिल कुळकर्णी / संदीप खरे

---

Get this widget | Track details | eSnips Social DNA

---

---

( Aggobai Dhaggobai lagali kal - Sandip Khare )

पराधीन आहे जगतीं - ग. दि. मा

( ऑडीओ - व्हीडीओ सहित )
दैवजात दुःखे भरतां दोष ना कुणाचा
पराधीन आहे जगतीं पुत्र मानवाचा

माय कैकयी ना दोषी, नव्हे दोषि तात
राज्यत्याग काननयात्रा, सर्व कर्मजात
खेळ चाललासे माझ्या पूर्वसंचिताचा
पराधीन आहे जगतीं पुत्र मानवाचा

अंत उन्नतीचा पतनीं होइ या जगात
सर्व संग्रहाचा वत्सा, नाश हाच अंत
वियोगार्थ मीलन होतें, नेम हा जगाचा
पराधीन आहे जगतीं पुत्र मानवाचा

जिवासवें जन्मे मृत्यू, जोड जन्मजात
दिसे भासतो तें सारें विश्व नाशवंत
काय शोक करिसी वेड्या, स्वप्निंच्या फळांचा ?
पराधीन आहे जगतीं पुत्र मानवाचा

तात स्वर्गवासी झाले, बंधु ये वनांत
अतर्क्य ना झालें काहीं, जरी अकस्मात
मरण-कल्पनेशीं थांबे तर्क जाणत्यांचा
पराधीन आहे जगतीं पुत्र मानवाचा

जरामरण यांतुन सुटला कोण प्राणिजात ?
दुःखमुक्त जगला का रे कुणी जीवनांत ?
वर्धमान तें तें चाले मार्ग रे क्षयाचा
पराधीन आहे जगतीं पुत्र मानवाचा

दोन ओंडक्यांची होते सागरांत भेट
एक लाट तोडी दोघां, पुन्हा नाहिं गांठ
क्षणिक तेंवि आहे बाळा, मेळ माणसांचा
पराधीन आहे जगतीं पुत्र मानवाचा

नको आंसु ढाळूं आतां, पूस लोचनांस
तुझा आणि माझा आहे वेगळा प्रवास
अयोध्येंत हो तूं राजा, रंक मी वनींचा
पराधीन आहे जगतीं पुत्र मानवाचा

नको आग्रहानें मजसी परतवूंस व्यर्थ
पितृवचन पाळून दोघे हो‍उं रे कृतार्थ
मुकुटकवच धारण करिं, कां वेष तापसाचा
पराधीन आहे जगतीं पुत्र मानवाचा

संपल्याविना हीं वर्षें दशोत्तरीं चार
अयोध्येस नाहीं येणें, सत्य हें त्रिवार
तूंच एक स्वामी आतां राज्यसंपदेचा
पराधीन आहे जगतीं पुत्र मानवाचा

पुन्हां नका येउं कोणी दूर या वनांत
प्रेमभाव तुमचा माझ्या जागता मनांत
मान वाढवी तूं लोकीं अयोध्यापुरीचा
पराधीन आहे जगतीं पुत्र मानवाचा

---

गीत : ग. दि. माडगूळकर ( गीतरामायण )
संगीत : सुधीर फडके
स्वर : सुधीर फडके

---

Get this widget | Track details | eSnips Social DNA

---

---

( Paradhin aahe jagati putra manavacha - Ga Di Madgulkar )

जेव्हा तिची नि माझी - मंगेश पाडगावकर

( ऑडीओ - व्हीडीओ सहित )
जेव्हा तिची नि माझी चोरून भेट झाली
झाली फुले कळ्यांची, झाडे भरास आली

दूरातल्या दिव्यांचे मणिहार मांडलेले
पाण्यात चांदण्यांचे आभाळ सांडलेले
कैफात काजव्यांची अन्‌ पालखी निघाली

केसांतल्या जुईचा तिमिरास गंध होता
श्वासातल्या लयीचा आवेग अंध होता
वेड्या समर्पणाची वेडी मिठी मिळाली

नव्हतेच शब्द तेव्हा, मौनात अर्थ सारे
स्पर्शात चंद्र होता, स्पर्शात लाख तारे
ओथंबला फुलांनी अवकाश भोवताली

---

गीत : मंगेश पाडगावकर
संगीत : यशवंत देव
स्वर : अरुण दाते

---

Get this widget | Track details | eSnips Social DNA

---

( Javha tichi ni majhi chorun bhat jhali - Mangesh Padgaokar )

जिवलगा, कधि रे येशील तू ? - ग. दि. मा

( ऑडीओ - व्हीडीओ सहित )
दिवसामागूनि दिवस चालले, ऋतू मागूनी ऋतू
जिवलगा, कधि रे येशील तू ?

धरेस भिजवुन गेल्या धारा
फुलून जाइचा सुके फुलवरा
नभ धरणीसी जोडुन गेले सप्तरंग सेतू !
जिवलगा, कधि रे येशील तू ?

शारदशोभा आली, गेली
रजनीगंधा फुलली, सुकली
चंद्रकलेसम वाढुन विरले अंतरीचे हेतू !
जिवलगा, कधि रे येशील तू ?

हेमंती तर नुरली हिरवळ
शिशीर करी या शरिरा दुर्बळ
पुन्हा वसंती डोलू लागे प्रेमांकित केतू !
जिवलगा, कधि रे येशील तू ?

पुनरपि ग्रीष्मी तीच काहीली
मेघावली नभि पुनरपि आली
पुनश्च वर्षा लागे अमृत विरहावर ओतू !
जिवलगा, कधि रे येशील तू ?

---

गीत : ग. दि. माडगूळकर
संगीत : सुधीर फडके
स्वर : आशा भोसले

---

Get this widget | Track details | eSnips Social DNA

---

---

( Jivalaga kadhi re yeshil tu - Ga Di Madgulkar)

पिकल्या पानाचा देठ कि हो हिरवा - जगदीश खेबुडकर

( ऑडीओ - व्हीडीओ सहित )
दरबार जुना हो हंड्या झुंबर नवं
मध्यान्ह रातीला आता लावा अत्तर दिवं
अंगाअंगी मी रंग खेळते, केसामधी मरवा
पिकल्या पानाचा देठ कि हो हिरवा !

नख लागंल बेतानं खुडा
केशरी चुना अन्‌ कात केवडा
लई दिसानं रंगल्‌ विडा
व्हटाची लाली टिपुनी घ्याया
मुखडा असा फिरवा
पिकल्या पानाचा देठ कि हो हिरवा !

थोडी झुकून थोडी वाकते
पडला पदर, लाज झाकते
नेम धरून बाण फेकते
तुमची माझी हौस इश्काची
हळू हळू पुरवा
पिकल्या पानाचा देठ कि हो हिरवा !

---

गीत : जगदीश खेबुडकर
संगीत : राम कदम
स्वर : शोभा गुर्टू
चित्रपट : कलावंतीण

---

Get this widget | Track details | eSnips Social DNA

---

---

( Pikalya panacha deth ki ho hirawa - Jagadish Khebudkar )

या भवनातिल गीत पुराणे - पुरुषोत्तम दारव्हेकर

( ऑडीओ - व्हीडीओ सहित )
या भवनातिल गीत पुराणे
मवाळ, हळवे सूर,
जाऊ द्या, आज येथुनी दूर

भावभक्तिची भावुक गाथा
पराभूत हो नमविल माथा
नवे गीत अन्‌ नवे तराणे
हवा नवा तो नूर

---

गीत : पुरुषोत्तम दारव्हेकर
संगीत : पं. जितेंद्र अभिषेकी
स्वर : वसंतराव देशपांडे
नाटक : कट्यार काळजात घुसली

---

Get this widget | Track details | eSnips Social DNA

---

( Ya Bhavanatil Geet Purane - Purushottam Darvhekar )

कुणि जाल का, सांगाल का - अनिल

( ऑडीओ - व्हीडीओ सहित )
कुणि जाल का, सांगाल का, सुचवाल का ह्या कोकिळा ?
रात्री तरी गाऊ नको, खुलवू नको अपुला गळा

आधीच संध्याकाळची बरसात आहे लांबली
परत जाता चिंब चुंबन देत दारी थांबली
फार पूर्वीचा दिला तो श्वास साहुन वाळला
आताच आभाळातला काळोख मी कुरवाळला

सांभाळुनी माझ्या जिवाला मी जरासे घेतले
इतक्यात येता वाजली हलकी निजेची पावले
सांगाल का त्या कोकिळा, की झार होती वाढली
आणि द्याया दाद कोणी रात्र जागुन काढली

---

गीत : आ. रा. देशपांडे ’अनिल’
संगीत : यशवंत देव
स्वर : पं. वसंतराव देशपांडे

---

Get this widget | Track details | eSnips Social DNA

---

---

( Kuni Jaal ka sangal ka , suchawal ka tya kokila - Anil )

गा गीत तू सतारी - शांताराम नांदगावकर

( ऑडीओ सहित )
गा गीत तू सतारी, गा गीत आसवांचे
या जीवनात वेडे, नाही कुणी कुणाचे

किती रंग गंध हळवे, फुलती भल्या पहाटे
होता दुपार विरती, निमिषात सांज दाटे
काळोख पीत येती, स्वर मंद काजव्याचे
या जीवनात वेडे, नाही कुणी कुणाचे

पंखात ऊब घेते, पिल्लू मुक्या खगाचे
चोचीत गोड दाणा घेण्यास जीव नाचे
पिल्लास पंख फुटता, घर शून्य पाखराचे
या जीवनात वेडे, नाही कुणी कुणाचे

टाक्यापरी सुईच्या स्वर आर्त छेदणारे
ते सांधती मनाचे आभाळ फाटणारे
गाण्यापरी जिण्याला, आकार भावनांचे
या जीवनात वेडे, नाही कुणी कुणाचे

---

गीत : शांताराम नांदगावकर
संगीत : अशोक पत्की
स्वर : राणी वर्मा

---

Get this widget | Track details | eSnips Social DNA

---

( Ga geet tu satari , ga geet asawanche - Shantaram Nandgaokar )

असेन मी, नसेन मी - शान्‍ता शेळके

( ऑडीओ सहित )
असेन मी, नसेन मी, तरी असेल गीत हे
फुलाफुलांत येथल्या, उद्या हसेल गीत हे

हवेत ऊन भोवती सुवास धुंद दाटले
तसेच काहिसे मनी तुला बघून वाटले
तृणांत फूलपाखरू तसे बसेल गीत हे
असेन मी, नसेन मी, तरी असेल गीत हे

स्वये मनात जागते न सूर ताल मागते
अबोल राहुनी स्वत: अबोध सर्व सांगते
उन्हे जळात हालती तिथे दिसेल गीत हे
असेन मी, नसेन मी, तरी असेल गीत हे

कुणास काय ठाउके कसे कुठे उद्या असू ?
निळ्या नभात रेखली नकोस भावना पुसू
तुझ्या मनीच राहिले तुला कळेल गीत हे
असेन मी, नसेन मी, तरी असेल गीत हे

---

गीत : शान्‍ता शेळके
संगीत : यशवंत देव
स्वर : अरुण दाते

---

Get this widget | Track details | eSnips Social DNA

---

( Asen mi nasen mi, tari asel geet he - Shanta Shelke )